სრულიად საქართველოს კათოლიკოს-პატრიარქმა, მცხეთა-თბილისის მთავარეპოსკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ მღვდელ-მონაზონ ბასილის (კორტავას) სულის მოსახსენიებელი პანაშვიდი გადაიხადა. სამების საკათედრო ტაძრის მღვდელ-მონაზვნის ცხედარი, რომელიც გუშინ მტკვარში იპოვეს, სამების საკათედრო ტაძრის ეზოში მდებარე წმინდა ილია წინასწარმეტყველის სახელობის ეკლესიაშია დასვენებული.

"თქვენ იცით, რომ ჩვენ გვეწვია დიდი მწუხარება - მანქანით მტკვარში გადავარდა ჩვენი მღვდელ-მონაზონი ბასილი. ღმერთმა ნათელში ამყოფოს მისი სული",- ბრძანა პატრიარქმა სამების საკათედრო ტაძარში საკვირაო ქადაგებისას, რის შემდეგაც მიცვალებულისთვის პანაშვიდის გადასახდელად წმინდა ილიას ტაძარში გადაინაცვლა.

მაშველებმა მტკვარში ავტომანქანა და მამა ბასილის ცხედარი გუშინ იპოვეს. როგორც ავტომობილი, ისე ცხედარი მდინარიდან გუშინ საღამოს, დაახლოებით 20:00 საათისთვის ამოიყვანეს. ავტომანქანას, რომელსაც სასულიერო პირი მართავდა, მტკვარში 17 მაისის შემდეგ ეძებდნენ.