საქართველოს მართლმადიდებელი ეკლესიის წმინდა სინოდი დღევანდელ სხდომაზე იმსჯელებს, მიიღებს თუ არა მონაწილეობას კუნძულ კრეტაზე გასამართ წმინდა და დიდ კრებაზე. ამის შესახებ დღეს საპატრიარქოსთან ჟურნალისტებს მღვდელმთავრებმა განუცხადეს.

"სწორედ ამაზე სამსჯელოდ ვართ ახლა, ჩვენი აზრი კონსოლიდირებული იქნება და არგუმენტირებული მივიღებთ თუ არა მონაწილეობას", - განაცხადა ვანისა და ბაღდათის მიტროლპოლიტმა ანტონმა.

წმინდა სინოდის სხდომის დაწყებამდე ჟურნალისტებთან კომენტარი გააკეთა ასევე ჭყონდიდელმა მიტროპოლიტმა პეტრემ.

"ახალი გარემოებებია და ვილოცოთ, რომ საქართველოს ეკლესიამ როგორც ყოველთვის გააცხადოს ნება ღვთისა და გააკეთოს სწორი არჩევანი", - აღნიშნა მეუფე პეტრემ.

მიტროპოლიტმა აღნიშნა, რომ წმინდა სინოდის სხდომაზე მეუფეებმა შესაძლოა განიხილონ საბერძნეთში, კრეტაზე გასამართ მართლმადიდებელ ეკლესიათა წმინდა და დიდ კრებაზე მიიღებენ თუ არა მონაწილეობას.

"მივესალმებით, ამ შემთხვევაში, თუ ავერიდებით ამ განსაცდელს. არის საკითხები, რომელიც დოგმატური საკითხების დარღვევას შეიცავს, ეკუმენისტური აზროვნებისა და მოძრაობის სახით, რომელიც კატეგორულად ემიჯნება მართლმადიდებლურ სწავლებას. ჩვენთვის მთავარია მართლმადიდებლობა დავიცვათ ისე, როგორც დაიცვეს ჩვენმა წინაპრებმა ათასწლეულების განმავლობაში, სისხლის ფასად", - განაცხადა მეუფე პეტრემ.
სავარაუდოდ წმინდა სინოდის განჩინება დღესვე გახდება ცნობილი.

მართლმადიდებელი ეკლესიების წმინდა და დიდი კრება კუნძულ კრეტაზე 16-27 ივნისს უნდა გაიმართოს. კრების დღის წესრიგის შესათანხმებლად ჟენევაში (შამბეზში) 22-27 იანვარს მართლმადიდებელ ეკლესიათა მეთაურების შეხვედრა ჩატარდა.

მართლმადიდებელ ეკლესიათა წმინდა და დიდი კრებაზე იმსჯელებენ ისეთ საკითხებზე როგორიც არის: მართლმადიდებლური ეკლესიების ურთიერთობა სხვა არამართლმადიდებელ ეკლესიებთან, ქორწინების დამაბრკოლებელი მიზეზები, კერძოდ, შერეული ქორწინებები მართლმადიდებლებსა და არამართლმადიდებელს შორის, ქორწინება ნათესაური კავშირის შემთხვევაში და სხვა. ამ საკითხებთან დაკავშირებით მართლმადიდებელ ეკლესიებს არაერთგვაროვანი დამოკიდებულება აქვთ.